10.11.2018 - AL Hierschtpatt: Photoen an Artikel
Den 10. November 2018 ass an eise Raimlechkeeten zu Izeg um AL Hierschtpatt d'Sëlwerplack «Dicks-Rodange-Lentz» un den Här Mil GOERENS iwwerreecht ginn, fir hie fir säi formidabelt 3-bännegt Soe Wierk «Eiser Soen» ze éieren.
10.11.2018 - AL Hierschtpatt
Den 10. November 2018 ass um 15:00 Auer an eise Raimlechkeeten zu Izeg (20, Conter Strooss) den AL Hierschtpatt. Jiddereen ass häerzlech invitéiert, och als Net-Member. Bei där Geleeënheet gëtt d'Sëlwerplack «Dicks-Rodange-Lentz» un den Här Mil GOERENS iwwerreecht, fir hie fir säi formidabelt 3-bännegt Soe Wierk «Eiser Soen» ze éieren.
D'Gebai läit net direkt un der Strooss an ass nëmmen iwwer privaten Terrain ze erreechen, wou dir och Parkplaze fannt.
24.10.2018 - AL Lidderowend
De 24. Oktober um 18:30 Auer organiséiere mir am Kulturhuef zu Gréiwemaacher e «Lëtzebuerger Lidderowend mat der AL». Et gëtt Piano gespillt a fir z'iesse kann een tëschent Wäinzoossiss, Kniddelen an eppes Vegetaresches wielen. W.e.g. mellt Iech hei un: actioun@letzebuergesch.lu
29.09.2018 - Ausfluch op Miersch an den CNL (Centre national de littérature)
Den 29. September 2018 organiséiere mir en Ausfluch op Miersch an den CNL. Um 9:44 Auer huele mir an der Stad den Zuch. Fir déi Leit déi net aus der Stad kommen, begéine mir äis um 10:15 Auer beim CNL (Centre national de littérature) op der Adress: 2, rue Emmanuel Servais, L-7565 Mersch. No der Visite beim CNL gi mir e Maufel iessen. W.e.g. mellt Iech bis spéitstens den 15. September 2018 un, an iwwerweist als Akkont 20€ op eise Kont: CCPLLULL IBAN LU75 1111 0066 4448 0000
21.07.2018 - Chamberwalen 2018
Am Kader vun de Chamber Walen 2018 ass d'Actioun Lëtzebuergesch vun alle Parteien ëmfaange ginn, déi an der Chamber vertruede sinn:
- LSAP, 17. Mee: Deputéierte Marc ANGEL, Deputéierte Franz FAYOT, Attachée parlementaire Simone ASSELBORN an Attachée parlementaire Nathalie SCHMIT
- Déi Gréng, 1. Juni: Deputéiert Sam TANSON an Assistant parlementaire Sven SCHILTZ
- DP, 18. Juni: Deputéierte Max HAHN an DP Generalsekretär Claude LAMBERTY
- CSV, 21. Juni: Deputéiert Octavie MODERT an Deputéiert Martine HANSEN
- ADR, 25. Juni: Deputéierte Fernand KARTHEISER, Attaché parlementaire Alain KLEEBLATT, Petitionär (698) Lucien WELTER a Lëtzebuergesch-Spezialistin Mandy KRIER
- Déi Lénk, 16. Juli: Déifferdénger Gemengerot Gary DIDERICH an Escher Gemengerot Guy KERSCH
D'Actioun Lëtzebuergesch gouf vum President Claude BACHE, Sekretär Patrick KAELL, Caissier Alexis KLEIN a vum Comitésmember Romain WACHTER vertrueden.
Ënnert anerem hu mir mat de Parteien déi heite Punkten diskutéiert:
- D'Gesetz iwwer d'Promotioun vun der Lëtzebuerger Sprooch.
- D'lëtzebuerger Sprooch an der geplangter neier Constitutioun.
- D'Unerkennung vun der lëtzebuerger Sprooch als EU Sprooch.
- D'Aféierung vun obligatoresche Lëtzebuergesch Coursen an den internationale Schoulen zu Lëtzebuerg.
- D'Grënnung vun enger INL Sektioun fir professionell Journalisten, an där d'lëtzebuerger Sprooch, d'Geschicht an d'Gesellschaft geléiert gëtt. D'Journalisten hunn eng Multiplikator Funktioun, an dowéinst ass et wichteg, datt si e proppert Lëtzebuergesch schwätze kënnen.
- D'Aféierung vun engem schrëftleche Lëtzebuergesch Test am Staatsbeamten Examen. Dat ass wichteg fir datt d'Beamten dem Bierger och schrëftlech op Lëtzebuergesch äntwere kënnen.
- D'Convocatioun fir d'Walen 2018 soll och op Lëtzebuergesch sinn.
21.06.2018 - Liesung mam Lex Roth a Karikature vum Carlo Schneider
De Lex Roth feiert seng 85 Joer. Feiert mat him den 21. Juni um 19:30 Auer um CNL zu Miersch (2, rue Emmanuel Servais, L-7565 Mersch).
Photogalerie op RTL: http://www.rtl.lu/fotoen/30410/#p1
13.05.2018 - 4. Lidderfouer am Schlass zu Beefort
D'Actioun Lëtzebuergesch ass de Sonnden, den 13. Mee op der 4. Lidderfouer nees mat engem eegene Stand vertrueden. Vergiesst net laanscht ze kommen!
Hei fannt Dir d'Detailer iwwer de Programm vun der 4. Lidderfouer am Schlass zu Beefort:
14.04.2018 - Generalversammlung 2018
De Comité vun der „Actioun Lëtzebuergesch“ invitéiert all seng Memberen op hir gewéinlech Generalversammlung an op hir aussergewéinlech Generalversammlung e Samschdeg, de 14. Abrëll 2018 um 15:00 Auer nomëttes zu Izeg -- 20, Conter Strooss (am Klouschter), wou mir zënter dem leschte Joer eise Sëtz hunn.
Déi Responsabel vun «Autisme Luxembourg a.s.b.l.» halen iwwer hir nei elektronesch Zeitung mam Numm «KONTERBONT», déi ganz op Lëtzebuergesch ass an deelweis vun Autiste gemaach gëtt, en Exposé.
06.03.2018 - Pressecommuniqué
Pressecommuniqué iwwer eis Roll an de Chamberwalen 2018
14.01.2018 - Interview um 100,7
"Pabeier ass gedëlleg": https://www.100komma7.lu/article/aktualiteit/pabeier-ass-gedelleg
13.01.2018 - RTL Reportage
RTL Reportage iwwert eisen Neijoerspatt zu Izeg: http://www.rtl.lu/kultur/1119321.html
13.01.2018 - Neijoerspatt 2018
De Comité vun der AL wënscht Iech fir d'Joer 2018 alles Guddes!
Am Joer 2017 si mir an eisen neie Büro op Izeg geplënnert a duerfir géife mir Iech gäre fir den 13. Januar 2018 um 15:00 Auer op eise Neijoerspatt zu Izeg invitéieren!
Op eiser Websäit fannt dir de Plang: http://www.actioun-letzebuergesch.lu/contact.html
W.e.g. mellt Iech mat enger E-Mail un!
18.11.2017 - Iwwereechung vun der Sëlwer Plaquette «Dicks-Rodange-Lentz»
Eise President Claude Bache bei der Iwwerreechung vun der Sëlwer Plaque «Dicks-Rodange-Lentz» un déi Responsabel vun de Walfer Bicherdeeg. (Photo RTL)
Eise Stand op de Walfer Bicherdeeg ass elo offiziell op.
18.11.2017 - Walfer Bicherdeeg
Den nächste Samschden a Sonnden (18. & 19. November 2017) sinn d'Walfer Bicherdeeg. D'Actioun Lëtzebuergesch ass, wéi d'lescht Joer och, nees mat engem eegene Stand vertrueden a mir géifen äis freeë wann dir géift laanscht kommen.
Dëst Joer iwwerreeche mir der Gemeng Walfer eis Sëlwer Plaquette «Dicks, Rodange, Lentz» fir déi besonnesch Verdéngschter fir eis Sprooch am Kader vun de «Walfer Bicherdeeg». Mat de «Walfer Bicherdeeg» hunn d'lëtzebuerger Auteuren a Kënschtler an de leschten zwee Joerzéngten eng flott Plattform krut, fir hir Wierker enger breeder Ëffentlechkeet virzestellen. Och eis Associatioun gouf op de «Walfer Bicherdeeg» ëmmer gutt emfaangen.
D'Iwwerreechung ass den 18. November um 10:00 Auer.
24.08.2017 - Pressecommuniqué
Eise Pressecommuniqué op d'Äntwert vum Gesondheetsministère un d'Chamber vum 19. Juni 2017 (Ref.: Bldxdbb46)
13.07.2017 - Diplomiwwereechung zu Schëtter
40 Leit kruten zu Schëtter en Diplom iwwerreecht, well si beim Sonja Bley Lëtzebuergesch Course besicht an ofgeschloss hunn. D'Gemeng Schëtter huet all Diploméierten en Exemplaire vum Buch «Eiser Lidder» geschenkt. Mir als AL hunn den Diploméierten d'Buch «Mosaiksteng» mat 6000 Wierder Lëtzebuergesch-Franséisch iwwerreecht.
Photo Galerie:
https://schuttrange.smugmug.com/Diplomiwwerreechung-L%C3%ABtzebuergesch-Coursen-2016-2017
21.05.2017 - Eise Stand op der Lidderfouer
Villmools Merci un déi Leit déi laanscht komm sinn
16.05.2017 - Wort Artikel iwwer eis Generalversammlung
11.05.2017 - 150 Joer Londoner Vertrag
Haut virun 150 Joer (11. Mee 1867) gouf de Londoner Vertrag ënnerschriwwen. Lëtzebuerg gouf definitiv onofhängeg an ass als «éiweg neutrale» Staat deklaréiert ginn. Et ass decidéiert ginn d'preisesch Garnisoun ze evacuéieren an d'Festung ofzerappen. D'Ofrappe vun der Festung huet 16 Joer gedauert.
Et ass déi éischte Kéier datt en internationale Vertrag och vu lëtzebuerger Vertrieder ënnerschriwwe gouf an zwar vum Victor de Tornaco (deemolege Staatsminister) a vum Emmanuel Servais. Frankräich, Preisen, Éisterräich, England a Russland hunn och ënnerschriwwen an hunn eis Neutralitéit garantéiert. Déi Neutralitéit gouf 1914 vun Däitschland net respektéiert.
29.04.2017 - Generalversammlung 2017
Léif Membren a Frënn, notéiert iech de Samschdeg, 29. Abrëll, mëttes um 3 Auer – Brasserie „Um Dierfchen“ – 6, côte d’Eich (Kasinosgaass) an der Stad.
De Comité vun der Actioun-Lëtzebuergesch freet sech op iech.
19.10.2016 - Artikel am Wort
Mir hunn och „eppes opweises“ E puer Gedanken iwwer den „Nation Branding“
23.09.2016 - Chamberspetitioun 698
Liest den Text vun der Petitioun
Liest d'Meenung vun eisem Comité
12.09.2016 - Artikel am Journal
De Lex Roth iwwer seng nei lëtzebuergesch Versioun vum "Petit Prince"
27.08.2016 - Nei Iwwersetzung vum Buch «De Klenge Prënz»
Déi nei Iwwersetzung vum Buch «De Klenge Prënz» gëtt et vun elo un an den Librairien LIBO, ERNSTER an ALINEA fir 29,00 € ze kafen.
Weider Informatiounen iwwert d'Buch fannt Dir op der Säit vum Verlag:
http://www.verlag-smo.de/erere/de-klenge-prnz/index.html
21.07.2016 - Artikel am Journal
08.07.2016 - Nei Verfassung
Op www.referendum.lu konnten normal Bierger hir Proposen zu der neier Verfassung erareechen. Den 8. Juli gouf et eng ëffentlech Sitzung an de Chamber. Fir d'Thema Sprooch goufe Serge TONNAR, Fernand FEHLEN, Jean-Claude KAELL, Jean-Louis KIEFFER invitéiert.
Kuckt Iech de Video un (vun der 18. Minutt u geet et ëm d'Sprooch)
05.07.2016 - National Schülerkonferenz (CNEL)
De CNEL fuerdert eng Opwäertung vun der lëtzebuerger Sprooch am Lycée:
La langue luxembourgeoise devrait être davantage valorisée au lycée. Aujourd’hui, la langue luxembourgeoise est uniquement apprise en classe de 7ième. La CNEL encourage le ministère à revaloriser la langue luxembourgeoise en introduisant un cours de luxembourgeois jusqu’à la classe 5ième/9ième.
